Okkur langar að kynna til leiks tilvonandi tromp og uppáhald húsbóndans Mirru frá Litla-Garði.

Mirra er undan gæðingnum Glym frá Árgerði og 1 verðlauna hryssunni Væntingu frá Ási 1.

Ýmislegt hefur gengið á hjá þessari ungu og efnilegu hryssu en hún eignaðist  slysafang aðeins 3 vetra gömul á köldum degi í april. Nokkrum dögum eftir köstun losnar hún í hnéskélinni (sem lýsir sér þannig að hún fær staurfót á hægri afturfót) og fengum við Gest dýralæknir  vin okkar í hana og hann var fljótur að koma henni í liðinn.

 Bar á þessu af og til á 4ða og 5ta vetri sem olli því að hægt gekk að temja hana á annan veg en að teyma hana á hesti og ná upp styrk í liðinn . Sagði Gestur okkur það að þetta myndi eldast af henni með meiri styrk og er það raunin, Mirra er að springa út og vonir Bigga að rætast en hann hefur talað um hana Mirru sína frá því að hún var folald að þarna væri einstakt efni á ferð og var fjölskyldan og allt tamningarfólk á þessum tíma búið að fá sig fullsatt af þessu tauti í kalli. 

Langar mig þess vegna að kynna hana hér fyrir ykkur lesendur góðir og deila með ykkur frumsýningunni hennar á Fákar og Fjör 2014. 

Mirra hefur mikið skref og fótalyftu á öllum gangi.

Hún er einstaklega næm og gleymir engu sem að henni er kennt, Þannig að það er betra fyrir húsbóndann að vanda sig :)

Fjörviljug, mikið fas, mikill fótaburður og svif :)

Sæl aftur.

Fleiri hross voru sýnd á Fákar og fjör frá okkur og ætlum við að skella hér inn nokkrum myndum til gamans.

Fyrsta er að telja Aldísi frá Krossum eða Hvítu Blesu en það er hún oftast kölluð á þessum bæ. Glæsileg Álfsdóttir sem við eigum ásamt Snorra Snorrasyni frá Krossum. 

Ekki amarleg uppsetning á þessari skvísu :)

Æðislegt skref og síðan er hún flugvökur líka.

Næst er Skerpla frá Brekku í Fljótsdal en hún er í eigu Magga í Steinnesi og hefur verið hér í þjálfun. Frábærlega skemmtileg alhliðahryssa sem er í stöðugri framför og á eftir að gera það gott á hringvellinum. Skerpla er til sölu og veitir Biggi allar frekar upplýsingar um hana í s 896-1249.

Glæsihryssa með flottan fótaburð og rými.

Sjáið þið skrefið,,,,,

Og ekki vantar neitt upp á rýmið:)

Síðan sýndu Biggi og Ásdís Helga tvær Glymsdætur. Ásdís okkar er búin að vera að þjálfa klárhryssuna Emilíönu sem er undan Snældu-Blesa dótturinni Elvu frá Árgerði. Emilíana er einstaklega taumlétt, viljug og næm hryssa.

 Er hún einnig til sölu. Uppl 896-1249

Flottar saman á mjúku fallegu tölti.

Sælir kæru vinir.
Eins og ykkur er kannski kunnugt um þá skelltum við okkur með Gangster í Ölfushöllina á stóðhestaveisluna um síðustu helgi. Komum heim á sunnudag og hófum strax undirbúning fyrir næstu sýningu, Fáka og fjör á Akureyri sem haldin var nú á miðvikudagskvöldið. Vorum við bara sátt með  "sveitastrákinn okkar" innan um alla þrautþjálfuðu reiðhallahestana á sýningunum.

Við tiltekt í tölvunni fundust þessar myndir af Gangster 5 vetra í kynbótadóm á Króknum:) Gaman að rifja upp það liðna um leið og við bíðum spennt eftir kvöldinu. Eins og flestum er kunnugt er Gangster að koma fram á stóðhestaveislu í Ölfushöllunni ásamt syni sínum Farsæl frá Litla-Garði og sýnist okkur á öllu að Gangster ætli að skila sínu vel til afkvæmanna :)

Já kæru lesendur, þetta blessaða veður hefur svo sannarlega ekki farið framhjá neinum. Þetta hefur nú loksins gengið yfir en annar eins snjór hefur aldrei sést í Litla-Garði síðan í "gamla daga".. þökk sé norðvestan áttinni og fallega skjólbeltinu okkar. 
Það var ævintýri líkast að ríða út í dag og komumst við ekki hjá því að smella nokkrum myndum af færðinni.
Látum myndirnar tala sínu máli. Enjoy. 

Yfirleitt getum við státað okkur af veðursæld hér í Litla-Garði, hér er með eindæmum snjólétt en síðustu tvo daga hefur ekki sést út úr augunum. En þá er bara að dunda með hrossin inni í skemmu, járna og skipta faxi. Var sett upp snyrtistofa í dag og var Biggi ekkert smá kátur að hafa 3 kellur í verkið :)

Sælir kæru lesendur.
Það hefur verið frekar lítið um fréttir hjá okkur þar sem að ný heimasíða er í vinnslu og hefur það því miður komið niður á þessari en þetta stendur nú allt til bóta. Hér í Litla-Garði gengur lífið sitt vanagang, mikið riðið út og ótrúlega margt af spennandi hrossum á öllum stigum tamningar.
Biggi ákvað að bregða sér af bæ seinustu helgi og taka þátt í ísmóti á Leirutjörn, enda kærkomið að geta farið á útimót þar sem að reiðhallasýningar tröllríða öllu svona yfir háveturinn :) Hann fór með tvær hryssur á mótið. Fyrst skal nefna Skerplu frá Brekku sem er verulega flott hryssa í eigu Magnúsar Jósefssonar í Steinnesi. Hún er viljug, hágeng alhliðahryssa með mikið fas sem getur gengið hvort heldur sem er í íþrótta eða gæðingakeppni. Fór Biggi með hana í töltið og höfnuðu þau í 2. sæti með einkunnina 6,75 úr forkeppni. Flottur árangur þar sem hún er nú að stíga sín fyrstu skref á keppnisbrautinni.

Vantar þig alvöru vakra, fallega og skemmtilega hryssu?

Tjékkaðu á Hágangsdótturinni Sigurdís --- Samfeðra Gangsternum og undan Flugumýrar-Ófeigsdótturinni Silfurtá frá Árgerði!

Hefur hlotið hæst 7.91 í kynbótadómi -

Höfuð: 8,0
   3) Svipgott  

Háls/herðar/bógar: 8,5
   1) Reistur   2) Langur   4) Hátt settur  

Bak og lend: 8,5
   3) Vöðvafyllt bak   6) Jöfn lend



Skeið: 9,0
   1) Ferðmikið   2) Takthreint  

Vilji og geðslag: 8,5
   2) Ásækni

Fet: 8,5
   2) Rösklegt   3) Skrefmikið  

Er í þjálfun og klár til prufu í Litla-Garði

Skemmtileg samantekt yfir árangur Gangsters hér á hestafréttum :


Þar velta þau upp spurningunni Besti hestur á Íslandi 2013?


Gangster hér á sínum magnaða 9.5 brokki! :)

Talsvert hefur verið tamið í haust til viðbótar undan honum og er óhætt að segja að hann lofi býsna góðu sem kynbótahestur og hafa allar bestu hryssurnar í Litla-Garði og Árgerði farið undir hann síðustu tvö ár a.m.k

Jæja nýárið gengið í garð og komin hugur í Litla-Garðsbændur. Húsin smá saman að fyllast af spennandi hrossum og frúin á bænum ætlar að reyna að vera dugleg að uppfæra fréttir, en að sjálfsögðu mun hún Ásdís okkar skjóta inn fréttaskotum af og til. Biggi hefur fengið hana Kristínu Birnu til aðstoðar og bjóðum við hana að sjálfsögðu velkomna til starfa. Engar myndir hafa verið teknar af hrossum enn sem komið er, en það verður bætt úr því hið fyrsta og fáið þið þá lesendur góðir að fylgjast með því helsta hjá okkur í vetur.